Bashkitë kërkojnë më shumë fonde për emergjencat dhe shlyerjen e borxheve
Pushteti vendor i kërkon qeverisë rritje fondesh për emergjencat, borxhet e trashëguara dhe sektorët bazë.
Në seancën dëgjimore të Komisionit për Ekonominë, Punësimin dhe Financat, përfaqësues të pushtetit vendor ngritën shqetësimin për borxhet e trashëguara nga reforma territoriale dhe nevojën për fonde shtesë për emergjencat, duke theksuar varësinë e lartë nga transfertat qendrore.
Borxhet e bashkive dhe kërkesa për mbështetje
Kryetari i Sarandës, Oltion Çaçi, kërkoi më shumë fonde për emergjencat dhe bashkërendim të taksës së ndërtesës me Agjencinë e Kadastrës për rritjen e të ardhurave, ndërsa kryetari i Pogradecit, Ilir Xhakolli, tha se bashkia ka ulur borxhet nga 6 në 2.5 milionë euro, por vendimet gjyqësore mbeten barrë e rëndë dhe kërkoi mbështetje me grante, duke propozuar që borxhet e trashëguara të konsiderohen borxh publik.
Të ardhurat nga renta minerare dhe kërkesat për sektorët bazë
Kryetari i Mirditës kërkoi rritje të përfitimit nga renta minerare, ndërsa drejtori i Institutit të Bashkive, Agron Haxhimali, kërkoi dyfishim të buxheteve për pyjet, kullotat, rrugët rurale dhe sistemet e ujitjes e kullimit, duke theksuar se fondet ekzistuese prej 6, 7 dhe 11 milionë eurosh janë të pamjaftueshme për 61 bashkitë.
Menaxhimi i fondeve dhe sfidat e pushtetit vendor
Haxhimali theksoi se ndonëse transferta qendrore ka arritur 47 miliardë lekë, problemi mbetet mënyra e përdorimit të fondeve, pasi vetëm 20% shkon për investime dhe 80% për kosto operative, duke kufizuar kapacitetin e bashkive për të përballuar detyrimet dhe shërbimet publike.
